Облыстық «Дидар» газетінің тілшісі, ақын Мұратхан Кенжеханұлының «Қоңыр қалжың» эпиграмма жинағының тұсаукесері өтті.
Оралхан Бөкей атындағы Өскемен қалалық кітапханасының қонақжай залы ақынның қалың оқырманына лық толды.
Айта кетсек, бұл – қазақ әдебиеті тарихындағы тұңғыш эпиграммалар жинағы. Кітаптың тұсауын облыстық «Дидар» газетінің редакторы Уәлихан Тоқпатаев пен қоғам қайраткері Түсіпхан Түсіпбеков кесті.
– Мұратханның бұл жинаққа енген эпиграммалары әуелде газетіміздің бір жобасы ретінде қолға алынып еді. Міне, енді жеке жинақ болып шықты. Жазуы қанық, әр жанның ішіндегі пернесін тап басып айта білген, – деді Уәлихан Тоқпатаев.
Кеш қызығын «Шабыт» студенттер театрының жастары енгізді. Жас әртістер ақын кейіпкерлерінің бейнесіне еніп, оқырманды күлкіге қарық қылды.
Оразай Жеңісұлы,
журналистика, 3 курс
